Tuesday, April 26, 2011

စုန်ရေတိုက်စားခြင်း

အပြ ;
............

ဒီနေ့တော့ အတော် အရောင်းပါးတဲ့နေ့ပါပဲ။

တစ်ဆိုင်လုံးမှ စားသောက်သူက တစ်ဝိုင်းထဲသာ ရှိနေတော့တယ်။

မျက်နှာစိမ်း လူငယ်လေးကတော့ ရုပ်ရည်သန့်ကလေးပဲ။ ၀တ်စားထားပုံးကလည်း သပ်သပ်ရပ်ရပ်ပါပဲ။ ကွမ်းရိုးစင်းကလေးတွေ ရိပ်ရိပ်ပါတဲ့ ရှပ်လက်ရှည်အဖြူကလေးက လင်းလို့။ ကချင်ပုဆိုးကွက်စိတ်ကလေးကတော့ အရောင့်ရင့်မှိုင်းမှိုင်းရယ်…။ ဆံပင်တိုတိုကိုလည်း သေသေသပ်သပ် ဖြီးသင်ထားပြန်တော့ သူ့ဆိုင်နှင့် ဘယ်လိုမှ မအပ်မရာဟု စိတ်အတွေးနဲ့တင် အားနာလှပြီ။ ဒါပေမယ့် လူငယ်လေးနဲ့ အတူတွဲထိုင်နေတဲ့သူကတော့ ညစ်ထေးပေကြံနေတာပဲ။ အင်္ကျီက လက်နှီးအ၀တ်တစ်စလို စွန်းထင်းပေပွလို့။ စုတ်ပြဲတစ်ချို့။ အဖာရာ ဗရဗွ။ ဂျင်းဘောင်းဘီရှည်ကို ဒူးဆစ်အောက်နားကနေ ဖြစ်သလိုဖြတ်ဝတ်ထားသေးတာ။ အပေါက်အပြဲ၊ ဖွာရာကျဲနေပြန်တော့ ဒီခောတ်အလန်းဒီဇိုင်း ပြောရမှာပေါ့။ သူကမှ ဆိုင်ကလေးနဲ့ လိုက်ဖက်ညီနေတော့တာ။ အသက်ကတော့ ခြောက်ဆယ်ကျော်ရောပေါ့။ ကောင်လေးနဲ့ဆိုရင် မြေးအဖိုးအရွယ်လို့တောင်ထင်ရတယ်။ ကောင်လေးကရှိလှမှ နှစ်ဆယ်ကျော်ပေါ့။

သိဟောင်းကျွမ်းဟောင်းတွေတော့ ဟုတ်ပုံမရ။ အခုမှ ဆုံတွေ့ကြရတဲ့ပုံနဲ့ တစ်ယောက်ကိုတစ်ယောက် မိတ်ဆက်နေကြပြန်တယ်။ လူငယ်လေးရဲ့လေသံက သိမ်သိမ်မွေ့မွေ့၊ စကားနည်းသလောက် မပြောမဖြစ် စကားထောက်ရတော့လည်း တိုးတိုးကလေးရယ်ဆိုတော့ သူ့နှုတ်ထွက်စကားတွေကို ဘေးလူတောင် မနည်းနားထောင်နေရတဲ့ပုံ။ လူကြမ်းကြီးကတော့ အားပါးတရ၊ ဟောင်ဖွာဖွာမို့ ငြိမ်သက်နေတဲ့ဆိုင်ကလေးထဲမှာ သူ့တစ်ယောက်တည်းရဲ့ အသံပဲ လှုပ်ခတ်နေတော့တယ်။

********

အဖြစ်(က);
..........

ဖြစ်နိုင်ရင် အဲဒီအကြောင်းတွေကို ပြန်မတွေးချင်ဘူး။ ပြန်လည်း မပြောချင်တော့ဘူး။ နှစ်တွေလည်း ကြာခဲ့ပြီ မဟုတ်လား။ အနည်းဆုံး နှစ် နှစ်ဆယ်ထက်တော့ မလျော့တော့ဘူးမောင်။

အင်း။ မင်းတိုက်တဲ့အရက်ကိုလည်း သောက်ထားမိနေပြီ။ မင်းကလည်း သိချင်လှတယ် ဒီလောက်ဖြစ်နေတာ။ အော်…အွန်လိုင်းပေါ်မှာ ၀တ္ထုဇာတ်လမ်းရေးချင်လို့..ဟုတ်စ။ မောင်ရင်က…ဘာ။ ဘလောဂ် စာရေးဆရာလား။ ကျုပ်တို့ဖြင့် ကြားဖူးပေါင်ဗျာ။

သူနဲ့ ကျုပ်နဲ့…။ အဲ…အဲဒီအဖွားကြီးနဲ့ ကျုပ်နဲ့ စတွေကြတာက မိုးတွေတအားသွန်ချသလိုရွာခဲ့တဲ့ တစ်ညမှာပေါ့။ ကျုပ်က အရက်ကလေးလည်း ခပ်ထွေထွေနဲ့ အိမ်အပြန် ညည့်နက်တတ်တဲ့ကောင်လေ။ မိန်းမကလည်း ဆုံးပြီးစ အချိန် ၊ သားတွေ သမီးတွေကလည်း အနားမှာ တစ်ယောက်မှ မနေနိုင်ကြတော့ လူကလွတ်နေတာ။ဆိပ်ကမ်းမှာ အလုပ်ရှိနေရင် ထမ်းစရာရှိတာ ထမ်းပိုပြီး အရက်ဆိုင်မှာ အချိန်ဖြုန်းနေတော့တာပဲ။ အချိန်လွန်မှ ကိုယ့်အရှိန်နဲ့ကိုယ် သိုင်းကွက်းနင်းပြီး အိမ်ပြန်တာ။ အဲဒီညက…ကျုပ်အိမ်ရှေ့ တံစက်မြိတ်ကလေးရှေ့မှာ အဖွားကြီးက မိုးခိုနေတာ။ တစ်ကိုယ်လုံးလည်း မိုးရေတွေ ရွှဲနစ်နေပြီး ခိုက်ခိုက်တုန်နေတာပဲ။

ကျုပ်လည်း စဉ်းစားမနေအားပါဘူး။ အိမ်ထဲခေါ်သွင်းပြီး နွေးထွေးအောင် ကျုပ်မိန်းမကျန်ရစ်တဲ့ အ၀တ်အစားတွေ လဲခိုင်းရတော့တာပေါ့။ ဒါတောင် နှုတ်ခမ်းတွေပြာနှမ်းပြီး တဆတ်ဆတ်တုန်နေတာက တော်တော်နဲ့ မပျောက်ဘူး။

န့နက်လင်းတော့ အဖွားကြီး…အသားတွေ ခြစ်ခြစ်တောက်ပူပြီး အဖျားတွေတက်နေလို့ ကျုပ်မှာ အိမ်ပေါ်သေသွားပြီး အမှုပတ်မှာလည်းစိုး။ သူ့အသက်တစ်ချောင်းလည်း မျက်နှာမလွှဲရက်နဲ့ ဒုက္ခတွေများလိုက်သေးတာ။ တစ်ပါတ်လောက် ဆေးကုယူရတယ် မောင်။

*********

အဖြစ် (ခ) ;
........

လောကမှာ ဒီလိုဖြစ်မျိုးတွေ တကယ်ရှိနိုင်သလားကွာ။ ငါတော့ ဒီတစ်ခါပဲ ကြုံဖူးတော့တယ်။ တစ်ခါဆိုလည်း ဆိုသလောက်ပဲ မောင်ရေ။

သူ့ဇာတိက ကျုပ်တို့မြို့နယ်ထဲက ရွာကြီးတစ်ရွာကဆိုပဲ။ ရွာမှာအိမ်နဲ့ ခြံဝိုင်းကလေးရှိပေမယ့် ကြုံရာကျဘမ်း လုပ်ကိုင်စားသောက်နေကြရတာတဲ့။ သားနှစ်ယောက်နဲ့ သမီးတစ်ယောက်ရှိတယ်တဲ့။ တစ်ယောက်ပြီးတစ်ယောက် အိမ်ထောင်တွေခွဲဆင်းသွားကြတော့လည်း အဖိုးကြီး ၊အဖွားကြီး လင်ကိုယ် မယားနှစ်ယောက်တည်း ကြုံရာ၊ကျရာ ဖြစ်သလိုလုပ်ကိုင်စားသောက်နေခဲ့ကြသေးတာ။ ဒီလိုနဲ့ အဖိုးကြီးဆုံးတော့လည်း ကိုယ့်ခြံ၊ ကိုယ့်အိမ်လေးမှာပဲ ရာသီစာသီးနှံလေးတွေစိုက်ပျိုးရင်း ခြိုးခြိုးခြံခြံ စားသောက်နေထိုင်ခဲ့ရသေးတာတဲ့။ သားသမီးတွေက သူတို့နဲ့ အတူလာနေလှည့်ပါ ခေါ်ပေမယ့် လိုက်မနေနိုင်ဘူး။

ဒါပေမယ့် သမီးလတ်ရဲ့ယောက်ျားက သူတို့ရွာမှာ ရန်ပွဲနွှဲရင်း အမှုတွေဘာတွေဖြစ်ကရော။ ငွေလိုတော့ အမေ့ဆီ အပူကပ်လာရော။ အမေ့မှာလည်း ဒီခြံဝိုင်းလေးတစ်ခုပဲရှိတာလေ။ ဒါပေမယ့် လောလောဆယ် ငွေလိုတဲ့ သမီးသာမက ကျန်သားနှစ်ယောက်ကလည်း အမေ့ခြံလေးကို မျက်စပစ်နေကြတာ အမေသိတယ်။

``ခြံကလေးရောင်းလိုက်ရင် ငါ…ဘယ်မှာ နေမလဲ။´´
``အိမ်မှာလိုက်နေ´´

သားကြီးရဲ့စကားကို သားလတ်နဲ့ သမီးငယ်ကလည်း ထောက်ခံတယ်။

``အမေ ပျော်သလို တစ်လှည့်စီ လိုက်နေလည်း ဖြစ်တာပဲ။´´
``အင်းလေ။ သမီးတို့လည်း အမေ့ကို ပြုစုခွင့်ရချင်သေးတာပေါ့´´

အမေကြီးက မျက်ရည် ကျရှာတယ်။ သွားလေသူ ကျေးဇူးရှင်ကြီးကိုလည်း သတိရရဲ့။ သားသမီးတွေရဲ့ သိတတ်မှုအတွက်လည်း ၀မ်းသာဝမ်းနည်း ဖြစ်မိရဲ့။ ပီတိတဝေေ၀နဲ့ သားကြီးအိမ်ပေါ်တက်လိုက်သွားမိတော့တာ တစ်နှစ်တောင် မကြာလိုက်ဘူး။ ခြံရောင်းရငွေကလေးက အသုံးမှ မခံတာ ကလား။ ငွေကုန်တာနဲ့ ချွေးမကြီးက ပညာပြလာတယ်။ သားကြီးက မမြင်ယောင်၊ မကြားယောင်ပြုနေတယ်။ ခြံရောင်းရငွေ အညီအမျှရခဲ့တာကို နည်းအံ့ထင်ပြီး စောင်းမြောင်းငြူစူဖူးတဲ့ ချွေးမငယ်ကလည်း အရိပ်အယောင်ပြလို့ ကြိုငြင်းနှင့်နေပြီ။ သားငယ်ကလည်း မိန်းမသြဇာအောက်မှာ နေသားကျပြီးသူ မဟုတ်လား။ သူစိမ်းဘက်ခပ်ပါပါ သမီးအိမ်ရောက်တော့လည်း သူ့ယောက်ျားရဲ့ ဘီးလူးဆိုင်းမှာ စီးချက်ညီညီ အသုံးတော်ခံနေခဲ့ပြီ။ အဖွားအိုတစ်ယောက် ကူကယ်ရာမဲ့ဘ၀မှာ ကြာရှည်သီးခံမနေနိုင်ဘူး။ အဲတော့ ဖြစ်ချင်ရာဖြစ်ဆိုပြီး ခြေဦးတည့်ရာထွက်လာခဲ့လိုက်တာ အဲဒီမှာ ကျုပ်နဲ့တွေ့တာပဲ။

********

အဖြစ် (ဂ);
.........

ကျုပ်ကိုယ်တိုင်က တစ်နေ့လုပ်မှ တစ်နေ့စားရတဲ့သူဆိုပေမယ့် ကိုယ့်အမေအရွယ် ဒုက္ခသည်ကြီးကို မျက်နှာလွှဲမထားနိုင်ခဲ့ဘူးလေ။

ကျုပ်က နံနက်မိုးမလင်းခင် အိမ်ကထွက် အလုပ်သွား၊ မိုးစုန်းစုန်းချုပ်၊ ညည့်နက်မှ အိမ်ပြန်ရောက်တော့တာ။ ထမင်းဟင်းကိစ္စလည်း လမ်းဘေးဆိုင်မှာပဲ ဖြစ်သလို ရှင်းတာ..။ အဖွားကြီးရောက်လာတော့ သူ့အတွက်ပါ စဉ်းစားရပြီ။ ဒါပေမယ့် အဖွားကြီးက မပူနဲ့တဲ့။ သူ့ဘာသာ ရှာဖွေစားမယ်တဲ့။ ပြီးရော…ကျုပ်အိမ်ပေါ်မှာ သဘောရှိသလိုသာနေပေတော့လို့။ ခမျာ ကျေးဇူးတင်လို့ မျက်လုံးမှုန်သီသီက မျက်ရည်တွေတောင် ၀ဲလို့။

ကျုပ်ကလည်း ဘယ်လောက်တောင် အနားသတ်မဲ့တဲ့လူလည်းဆိုတာ ကိုယ့်အိမ်ရောက်နေတဲ့ အဲဒီအဖွားကြီး ဘာတွေလုပ်နေတယ်ဆိုတာတောင် သူများပြန်ပြောမှ သိရတော့တဲ့ အဖြစ်။ အဖွားကြီးက လူစည်ကားတဲ့ မြို့ထဲက လက်ဘက်ရည်ဆိုင်တွေ၊ စားသောက်ဆိုင်တွေမှာ လိုက်ပြီး တောင်းရမ်းနေတာကိုး။ နေ့တဓူဝ ဘုံဆိုင်လောက်ပျော်နေတတ်တဲ့ ကျုပ်အတွက် အဲဒီဆိုင်တွေဆီ ခြေဦးမှ မလှည့်ဖူးတော့ မသိလိုက်တာ ဆန်းသလား။

တစ်နေ့တော့ လိုင်းမော်တော်တစ်စီးဆီ ကုန်တွေဆင်းချပေးရင်း အဖွားကြီးနဲ့ အမှတ်မထင် ဆုံဖြစ်ခဲ့သေးတယ်။ ကျုပ်ကတော့ မော်တော် အတက်အဆင်းမှာ အဖွားကြီး ခြေချော်ကျမှာတို့၊ဘာတို့ ပူတာပေါ့။ အမေကြီး နောက်ဆို ကမ်းနားကို မဆင်းနဲ့ ပြောမိသေးတယ်။ အဲဒီနေ့က ရွာမှာကျန်ရစ်တဲ့ သူ့သားကြီးကမွေးတဲ့ မြေးအကြီးကောင်အတွက် ကျောင်းဝတ်စုံလေးတွေ သင်္ဘောစာရေးကတဆင့် ပို့ပေးခဲ့တာဆိုပဲ။ ရှုပ်ရှုပ်ယှက်ယှက်လို့တောင် ကျုပ်က ငြူစူမိသေးရဲ့။ ဘာလုပ်မှာလဲ။ ကိုယ့်ကိုတောင် မကြည်ဖြူတဲ့ဟာတွေ။ မိမှန်း၊ ဘမှန်း မသိတတ်တဲ့ဟာတွေကို လှည့်ကြည့်စရာလားလို့။ ဟုတ်တယ်လေ။ မိဘမေတ္တာဆိုတာ ပွဲရုံတို့ စားသောက်ဆိုင်တို့မှာ မှည့်လေ့ရှိတဲ့ နာမည်လောက်နားလည်တဲ့ဟာတွေ။

ဒါပေမယ့် မိခင်ကတော့ ဘယ်ရမှာလဲ။ ဘာလေးရရ ကမ်းနားဆင်းပြီး လှေကြုံမျှော်တတ်တာ။ သူစားဖို့ အိမ်တွေကပေးလိုက်တတ်တဲ့ ပန်းသီးလေးတစ်လုံးကအစ မြိုမကျပဲ လှမ်းပို့တတ်တာ သိလာရတော့ မနေနိုင်တော့ဘူး။ အဖွားကြီး အိမ်ပြန်ချင်ပြီလားလို့ တွေးတယ်။ သားသမီး၊ မြေးမြစ်တွေကိုလည်း လွမ်းလှရောပေါ့။ အဖွားကြီး ကျုပ်အိမ်မှာ ရှိနေတဲ့အကြောင်း သူ့သားသမီးတွေကို အသိပေးသင့်တယ်လို့ တွေးမိတယ်။ ဒါပေမယ့် သူတို့ အမေကို ပြန်လာခေါ်ကြလိမ့်မယ်လို့တော့ တယ် မထင်ပါဘူး။ ကျုပ်အထင်လည်း မလွဲပါဘူး။ ခွေးတစ်ကောင်၊ ကြောင်တစ်မြီးမှ ရောက်မလာကြပါဘူး။

********

အဖြစ်(ဃ);
..........

အကုသိုလ်ဆိုတာ အဖော်နဲ့ အပေါင်းနဲ့လာတတ်တယ် ဆိုတဲ့စကား သိပ်မှန်တာပဲ။

အဖွားကြီး ကားတိုက်ခံလိုက်ရတယ် တဲ့။ ကျုပ် ကြား ကြားချင်း အပြေးရောက်သွားတော့ ဆေးရုံမှာတင် ဆုံးနှင့်ရှာပါပြီ။

အမှန်တော့ အဖွားကြီးဟာ ကားတိုက်ခံရလို့ သေတာ မဟုတ်ဘူး။ နေ့လည်ကြောင်တောင် နေပူကြီးထဲမှာ မူးပြီး လဲကျသွားတာ။ သူလဲကျတာက ခပ်ဖြည်းဖြည်းမောင်းလာတဲ့ ကားပေါ်ကိုလေ။ ထိခိုက်ဒဏ်ရာ ဘာမှ ရှာမတွေ့ပဲ ဦးနှောက်သွေးကြောပြတ်ပြီး သေရတော့တာ။

ဒါပေမယ့် ကားပေါ်ပါလာတဲ့ မိသားစုက သဘောထားပြည့်ကြပါတယ်။ မြို့ပေါ်မှာ ကြွယ်ပိုးကြွယ်ဝ မိသားစုတွေဆိုတော့ အဖွားကြီးရဲ့ဆေးရုံကိစ္စ၊ နာရေးကိစ္စ အားလုံးကို ကူညီစီစဉ်ပေးကြပါတယ်။ သူ့သားသမီးတွေကိုလည်း အကြောင်းကြားကြရတာပေါ့.။ ဒါပေမယ့် အသုဘသာ ရက်လည်သွားရော။ ဘယ်သူမှ အရိပ်အယောင်တောင် လာမပြကြပါဘူး။

ကားပိုင်ရှင် မိသားစုကလည်း တမှောင့်။ သူ့သမီးလေးက ညတိုင်းအိပ်မက်မက်နေတယ်တဲ့။ အိပ်မက်ထဲမှာ အဖွားကြီးက ညှိုးငယ်ငိုယိုနေတာတဲ့။ ရွာမှာကျန်ရစ်တဲ့ သားသမီးတွေကို အရမ်းတွေ့ချင်နေတယ်တဲ့။ သူ့ဆီခေါ်လာပေးဖို့ အထပ်ထပ်တောင်းပန်သတဲ့။ အဲဒါ အဖွားကြီးကို ရည်စူးပြီး အလှူအတန်းလေး လုပ်ပေးချင်ပါတယ်ပေါ့။ ဖြစ်ပြန်ရော..။ ဒါပေမယ့် အဲဒီအထိ ကျုပ်လက်ခံနိုင်ပါတယ်။ ခက်တာက သူ့သားသမီးတွေကိုလည်း အဖွားကြီး စကားအတိုင်း မှာပေးပါတဲ့လေ။ အဖွားကြီးကို ရည်စူးလို့ ရွာမှာအလှူလေး၊ အတန်းလေးပြုခိုင်းရအောင် သူတိုလည်း ငွေကြေးထောက်ပံ့ပေးချင်တယ်တဲ့။ ကျုပ်ဘ၀င်မကျလှပေမယ့် သူတို့ တတ်နိုင်လို့ သူတို့ပေးတာ။ ကြားလူ ကျုပ်က ဘာပြောနေတော့မှာလဲ။ ကလေးမက ပြောသေးတာ။ သူတို့က ငွေကြေးထောက်ပံ့ပါ့မယ်ဆိုတဲ့အကြောင်း သေချာစာနဲ့ရေးပေးတာ။ ကျုပ်ကိုစာပို့ပြီး မှာပေးဖို့ အထပ်ထပ်ပြောနေသေးရဲ့။

ရောက်မလာနိုင်တော့ဘူး ထင်ထားပေမယ့် ရောက်လာကြတော့လည်း ဆိုင်းမဆင့်၊ ဗုံးမပါပဲ။ ချက်ချင်းကို ရောက်ချလာကြတာ။ ကျုပ်ဖြင့် အံ့အားကိုသင့်လို့။

သမီးနဲ့ချွေးမတွေ ငိုသံပွက်လောရိုက်နေပြန်တော့တာ ကျုပ်ရဲ့ တဲသာသာအိမ်ကလေးကို ပြိုကျတော့မတတ်ပဲ။ သူတို့ အမေရဲ့ သတင်းကို ခုမှ ရလို့ ချက်ချင်း၊ အားချင်းလိုက်လာကြတာဆိုပဲ။ လိုင်းမော်တော် ဆိုက်ကပ်ချိန်မဟုတ်လို့ ပဲ့ထောင်စက်လှေနဲ့တောင် လာခဲ့ကြ သတဲ့ဗျာ။

အမေကိုတငိုရင်း ဇာတ်ကြောင်းပြန်ကြသေးတာပေါ့။ အမေကြီးပျောက်လို့ အရပ်တကာလှည့်ပြီး စုံးစမ်းကြ၊ ရှာဖွေကြတာ လည်းပါရဲ့။ ဆေးရုံရောက်နေတယ်လို့ ခုမှကြားသိတော်မူကြဆိုပဲ…ထွီ။ ကျုပ်ဖြင့် ပြောချလိုက်ချင်တာ အူကိုယားနေတာပဲ။
အလှူရှင်သားအဖတွေ ရောက်လာပြန်တော့ အရှိန်ကျလုနေပြီဖြစ်တဲ့ အဆို၊ အငိုတွေက တစ်စခန်းထလာပြန်ရော။ သမီးကြီးက ဒီတစ်ခါ မျက်ဖြူလန်ပြီးတက်သွားလို့ ယောက်ျားတွေက နှာနှပ်ပေးကြ၊ ကျန်မိန်းမတွေက ယပ်ခတ်ပေးကြနဲ့ ဟုတ် ဟုတ်သေးတော့။ မနေနိုင်တဲ့ အဆုံးတော့ ကျုပ်လည်း ရောက်နေကျဘုံဆိုင်ကလေးဆီပဲ ထွက်လာခဲ့လိုက်တော့တယ်။ သင်းတို့တတွေကို ကျောခိုင်းခဲ့ရတာတောင် နားထဲ၊ အူထဲမှာ ပလုံစီထနေသေးတယ်။

ဟိုမိသားစုက အဖွားအတွက်သူတို့တတွေ ရည်စူးအလှူလုပ်ခဲ့တဲ့အကြောင်း၊ သားသမီးတွေလည်း တတ်နိုင်သရွေ့ အမေ့အတွက် ရည်စူးလှူဒါန်း၊ အမျှပေးဝေစေချင်ကြောင်း ပြောပြီး အားလုံးမျက်နှာစုံညီရှေ့မှာ မတည်အလှူငွေ ငါးသိန်းပေးလိုက်သေးသတဲ့။

သင်းတို့လား…ငွေရပြီးကတည်းက ပျောက်သွားလိုက်ကြတာ အလှူသတင်းလည်း မကြားဘူး။ လူသတင်းလည်း စုန်းစုန်းမြုပ်ကရော။

ပြောခဲ့ပါပကော။ လောကမှာ ဒီလို သားသမီးတွေလည်း ရှိသေးတယ်ဆိုတာ ယုံချင်စရာတောင် မကောင်းဘူး မဟုတ်လား။ ယုံရင်တော့လည်း မင်းရေးမယ့် ဇာတ်လမ်းမှာ ထည့်ရေးပေါ့ကွာ။

မင်းကအစဖော်ပေးလို့သာ ပြောရတာ။ ဒါမျိုးအဖြစ်တွေကို နှစ်ခါပြန်မတွေးချင်၊ မပြောချင်ဘူး။ မင်းကတော့ ကျုပ်ကိုပြုစုထားတဲ့ မျက်နှာလည်းရှိတော့ ဟေး…ဟေး..။ သွားတော့မယ်မောင်၊ ကံမကုန်ရင်တော့ ပြန်ဆုံကြသေးတာပေါ့ကွာ။

********
အတွေး ;
..........

တစ်လှမ်းချင်းထွက်ခွာသွားတဲ့ လူကြီးရဲ့ ကျောပြင်ကို ငေးမောရင်း လူငယ်လေးကတော့ အတွေးတစ်ချို့နဲ့ ငြိမ်သက်နေခဲ့တယ်။

လူငယ်လေးရဲ့ အတွေးထဲမှာ…

သူ…ခုနစ်နှစ်သားအရွယ်မှာ မြို့ကစာတစ်စောင်ရောက်လာအပြီး အဖေတို့မောင်နှမတတွေ ၀မ်းသာအူမြူးနေခဲ့ကြတာ….

အားချင်း ပဲ့ထောင်လေးနဲ့ တစ်အုပ်တစ်မကြီး လိုက်ပါသွားကြတော့ သူတို့ရဲ့ နောက်ဆုံးခရီးမှန်း မသိတတ်ခဲ့သေးတဲ့ သူက အဖွားပို့ပေးခဲ့တဲ့ အဖြူအစိမ်းဝတ်စုံလေးနှင့် ရပ်လျှက် ငေးကျန်ရစ်ခဲ့တာ….

ခုတော့ အဖေတို့ မောင်နှမတွေ၊ သူတို့ရဲ့ ဇနီးခင်ပွန်းတွေ အိမ်အပြန်လမ်းမှာ အစုလိုက်ပဲ့ထောင် စောင်းမှောက်ခဲ့ရတဲ့ အကြောင်းရင်းကို လူငယ်လေး သိသွားခဲ့ရပါပြီ။ ။



မြတ်စိုး
သူငယ်ချင်းတစ်ယောက်ရဲ့ ပထမဆုံး ၀တ္ထုတိုပါ။

Monday, April 18, 2011

အသားတံဆိပ်



ဦးခွေးနီစပ်ကြီးမှာ ငယ်နာမည်နောက်တစ်မျိုး ရှိသေးတဲ့အကြောင်းကို သူ့မိသားစုနဲ့ နီးစပ်ပတ်သက်ရာ တချို့ကလွဲရင် ဘယ်သူမှ မသိခဲ့ကြပါဘူး။ မသိဆို….သူတို့တစ်သက်လုံး ဦးခွေးနီစပ်ကို ဦးခွေးနီစပ်ရယ်လို့ပဲ ခေါ်ကြတာသာ ကြားခဲ့ဖူးကြတာလေ။ သူတို့တွေကိုယ်တိုင်လည်း ပြောဆိုဆက်ဆံစရာ အရေးအကြောင်းကြုံလာရင် ဦးခွေးနီစပ်ကို ကိုခွေးနီစပ်၊ ဦးလေးခွေးနီစပ်၊ ဘကြီး..ခွေးနီစပ် ရယ်လို့သာ သုံးနှုန်းဆက်ဆံလာခဲ့ကြဖူးတာ။ အဲဒီအခါတွေတုန်းကလည်း အဆင်ပြေနေခဲ့တာပဲ မဟုတ်လား။ ဦးခွေးနီစပ်ကြီးမှာ တခြားငယ်နာမည်တစ်မျိုး ရှိနေဦးမယ် ဆိုတဲ့အတွေးကို တစ်ခါမှကို မတွေးခဲ့ကြစဖူး။ တစ်ယောက်ယောက်က ပြောလာခဲ့ရင်လည်း သိပ်စိတ်ဝင်စားမိ၊ မှတ်သားထားမိမယ် မထင်ဘူး။ သူတို့အဖို့တော့ ဦးခွေးနီစပ်ကြီးကို ဦးခွေးနီစပ်ကြီးရယ်လို့သာ ခေါ်ပြောဆက်ဆံရတာ နှုတ်စွဲပြီး အဆင်ပြေနေခဲ့ကြတာ မဟုတ်လား။

ဒါပေမယ့်…အခု…ဦးခွေးနီစပ်ကြီးကို ဦးခွေးနီစပ်ကြီးလို့ ခေါ်ဖို့ အဆင်မပြေ တော့ဘူးတဲ့။

                                    @@@@@@@@@@@

ဖြစ်ပုံက ရပ်ကွက်ထဲမှာ မင်္ဂလာဆောင်အခမ်းအနား တစ်ခုအတွက် ဖိတ်စာဝေရာက စတာပဲ။ ရပ်ကွက်ထဲကို မင်္ဂလာဆောင်ဖိတ်စာ ဝေကြမယ်ဆိုတော့ နှစ်ဘက်မိဘတွေနဲ့ သတိုးသာလောင်း၊ သတို့သမီးလောင်းတွေ ခေါင်းချင်းဆိုင်ကြ။ သူ့ဘက်၊ ငါ့ဘက်အမျိုးအဆွေ၊ ရပ်နီးရပ်ဝေး မိတ်သင်္ဂဟတို့ရဲ့နာမည်တွေ ရွတ်ကြ၊ ရေးကြပေါ့။ လမ်းထဲက အိမ်တွေကိုတော့ တန်းစီပြီး ဖိတ်ကြရမှာပဲ။ ရောက်လာချီးမြှင့်တာ၊ မချီးမြှင့်တာကတော့ သူတို့ဘက်က အပိုင်းပဲမဟုတ်လား။

ဥိးဇော်မင်းသန်းနဲ့ဇနီး
ဦးထွန်းထွန်းသူနဲ့ ဇနီး

…စသည်ဖြင့် နာမည် ခေါ်ပေးတဲသူက ခေါ်ပေး။ ဖိတ်စာထည့်မယ့် စာအိတ်ပေါ်မှာ လက်ရေးလှလှနဲ့ ရေးတဲ့သူကရေးပေါ့။

``ဦးခွေးနီစပ်နဲ့ဇနီး´´

အနားမှာရှိနေတဲ့တစ်ယောက်က သတိပေးတယ်။ ဦးခွေးနီစပ်ရဲ့နာမည်က ဦးခွေးနီစပ် မဟုတ်တော့ဘူးတဲ့။ ဒါဆို ဘယ်သူလဲဆိုတော့ သူလည်း ဇဝေဇ၀ါနဲ့ မေ့တေ့တေ့ဖြစ်နေတယ်တဲ့။ လက်တစ်ကမ်းမှာရှိနေတဲ့ လူပရိတ်သတ်ထဲမှာလည်း သိတဲ့သူမရှိဘူး။ နာမည်သေချာအောင် စောင့်နေရရင် အလုပ်နှောင့်နှေးမှာလည်း စိုးရသေးတယ်။ ခဏဆိုပြီး တေးမှတ်ဖယ်ချန် ထားခဲ့ဖို့ဆိုတော့လည်း မတော်တဆ အပြီးမေ့ကျန်နေခဲ့မှ မျက်နှာပျက်စရာတွေ ဖြစ်နေရဦးမယ်။ အဲဒီအခါကျ ဖိတ်စာရေးတဲ့သူတွေ အပြစ်ကျလာဦးတော့မယ်။ အဲတော့ ထူးပါဘူးကွာ။ ရေးသာရေး…။ အေးလေ… ဒီပြင်တခြားနာမည် ရှိနေတယ်လို့ တို့လည်း မကြားမိပါဘူး။ ရေးသာရေးလိုက်တော့ ဦးခွေးနီစပ်ပဲ။

အဲလိုနဲ့ ဖိတ်စာဝေတဲ့ လူငယ်လေးတွေ ဦးခွေးနီစပ်ကြီးရဲ့ အိမ်လည်းရောက်ရော ပြဿနာတက်ကြပါလေရော…။

``ဒီဖိတ်စာ ဘယ်သူရေးတာလဲ´´

ဘယ်သူရေးတယ်ရယ်လို့တော့ အသေအချာ ဘယ် မှတ်မိမှာတုန်း။ သတို့သားရဲ့ သူငယ်ချင်းအသိုင်းအ၀ိုင်းတွေထဲက ဒီလိုပဲကြုံရာလူ ၀ိုင်းဝန်းရေးပေးကြတာပဲပေါ့။

``ငါ့နာမည် ဦးခွေးနီစပ်လို့ မင်းတို့ကို ဘယ်သူပြောလဲ´´

ပြောစရာ လိုသေးလို့လား။ ဦးခွေးနီစပ်ကြီးရဲ့နာမည်ဟာ ဦးခွေးနီစပ်ဆိုတာ တစ်ရပ်ကွက်လုံး သိနေနှင့်တဲ့ဥစ္စာ။

``မင်းတို့ကောင်တွေ မသေမချင်း မှတ်ထားကြ။ ငါ့နာမည် ခွေးနီစပ် မဟုတ်တော့ဘူး။ အောင်…….မှတ်၊ ဦးအောင်မှတ်ကွ´´

ဦးခွေးနီစပ်ကြီးရဲ့ အမျိုးသမီးကလည်း….

``ပြောလိုက် အဲဒီမင်္ဂလာဆောင်အိမ်ကို ။ ဦးခွေးနီစပ်လို့ ဖိတ်စာမှာရေးဖိတ်တာ အရမ်းစိတ်ဆိုးတယ်လို့။ မင်္ဂလာပွဲကိုလာစေချင်ရင် ဦးအောင်မှတ်လို့ ပြောင်းဖိတ်ပေးမှ လာမယ်´´

ဖိတ်စာဝေတဲ့ ကလေးတွေလည်း ပြာပြာသလဲ တောင်းပန်ကြရတာပေါ့၊ ပြီး… အပိုပါသွားတဲ့ ဖိတ်စာအသစ်ပေါ်မှာ …..

ဦးအောင်မှတ်နှင့် ဇနီး

…ဆိုပြီး ချက်ချင်း ရေးဖိတ်ခဲ့ကြတာတောင် မကျေနိုင်၊ မချမ်းနိုင် မြည်တွန်ဗျစ်တောက်သံတွေက တတွတ်တွတ် နောက်က လိုက်လာနေတုန်းမို့ ဝေးရာဝေးကြာင်းဆီ အသော့နှင်ပြေးခဲ့ကြရသတဲ့။

@@@@@@@@@@@

နောက်မှ သိကြရတာက ဦးခွေးနီစပ်ကြီး ဆိုတဲ့ အဲဒီနာမည်က ရာဇ၀င်နဲ့ကို ချီလာခဲ့တာဆိုပဲ။

မိနစ်ပိုင်းကလေးခြားပြီး လူ့လောကထဲ ရောက်လာကြတဲ့ အမြွာညီအစ်ကို နှစ်ယောက်ကို သဲသဲလှုပ်လှုပ် အထွဋ်တင်ချစ်မ၀တဲ့ သူတို့ရဲ့မိဘနှစ်ပါးက အောင်မြတ်နဲ့ အောင်မှတ်ဆိုပြီး အောင်အတိတ်နဲ့မင်္ဂလာယူကာ အမည်သညာ မှည့်ခေါ်ခဲ့ကြတာပါ။ ညီအစ်ကိုအမြွာ လူမှန်းသိတတ်စ ကတည်းက မိဘအပါအ၀င် ၀န်းကျင်အသိုင်းအ၀ိုင်းနဲ့ ဆွေမျိုးစုအားလုံးက အရေးပေး၊ အလိုလိုက်ခဲ့ကြတော့ တစ်နေ့တခြားကို ဆိုးသွမ်းလာခဲ့ကြတော့တာ။ လူပျိုပေါက်အရွယ်ကလေးတွေ ရောက်လာကြတော့ မိဘပိုက်ဆံကိုလည်း ရေလိုသုံးတတ်နေကြပြီ။ လစ်ရင်ခိုးယူတယ်။ မလစ်ရင် လုယူမယ် ဆိုတဲ့အထိကို ဖြစ်လာကြပြီ။ မကောင်းမှုနဲ့ မွေ့လျော်သူတွေ နေပျော်ရာအရပ် မှန်သမျှ သူတို့ညီအစ်ကိုလည်း ရောက်ဖူးတယ်။ မင်းမူဗိုလ်ကျတယ်။ ရမ်းကားနေပျော်တယ်။ အရပ်ထဲမှာ ရန်ပွဲဟေ့လို့ အသံမကြားလိုက်ရနဲ့။ အမြွာနှစ်ယောက်ကတော့ တစ်ဖက်မှာပါပြီးသားပဲ။ တစ်ခြားသူတွေနဲ့မှ ရန်မဖြစ်ရရင် ညီအစ်ကို အချင်းချင်းဖြစ်တယ်။ ရန်ဖြစ်ပြီဆို ဘယ်သူဝင်ဆွဲ၊ ၀င်တားလို့မှ မနိုင်ဘူး။ ညီအစ်ကို အချင်းချင်း သူစိမ်းပြင်ပြင်တွေလို တုတ်ဆွဲ၊ ဓါးဆွဲလည်း လုပ်တတ်ကြသေးတာပါ။ ဆိုဆုံးမလို့ မနိုင်တာထားလို့ လိုဘမပြည့်ရင် အဖေ၊အမေကိုတောင် ချမ်းသာမပေးပဲ ရန်လုပ်ရမ်းကားတတ်သေးတာဆိုတော့ ကမ်းကုန်ပါလေရော။ အိမ်မှာ လက်တိုလက်တောင်း အကူခေါ်ထားတဲ့ ဆွေမျိုးနီးစပ် မိန်းခလေးတွေ ဆိုလည်း ဘယ်သူမှ လပိုင်းထက်ပိုပြီး ကြာကြာ မမြဲဘူး။ အစ်ကိုမဟုတ်ရင် ညီက အနိုင်ကျင့်ပြီးသား။ အခွင့်သာတာနဲ့ စော်ကားပြီးသား။ အဲဒီလိုနဲ့ အငယ်ကောင်အောင်မြတ် တစ်ယောက်တော့ သူတပါးလက်ချက်နဲ့ စောစောစီးစီး သေခဲ့ရတော့တယ်။

အောင်မြတ်ဆုံးသွားတော့ အောင်မှတ်တစ်ယောက်လည်း နည်းနည်းတော့ ဆင်ခြင်သွားတယ် ပြောရမယ်။ ရန်ပွဲတွေလည်း ကျဲသွားတယ်။ အိမ်နေလည်း မြဲလာခဲ့တယ်။ အသုံးအဖြုန်းလည်း အရင်ထက်စာရင် အတော်ကလေး ဆင်ခြင်လာတယ်လို့ ဆိုကြရဲ့။ ဒါပေမယ့် ခဏပါပဲ။ ခွေးမြီးကောက် ကျည်ထောက်စွတ်ပေးထားလည်း ခဏနေတော့ မူလပကတိအတိုင်း ကောက်မြဲကွေးမြဲပဲမဟုတ်လား။

ဒီပုံအတိုင်းဆိုရင် အောင်မှတ်တစ်ယောက်လည်း ဘယ်သူ့လက်ချက်နဲ့ တစ်နေ့ သေရဦးမယ်မသိဘူး။ မိဘတွေက ပူပန်စိုးရိမ်လာကြတယ်။ အဲဒီမှာ ဘယ်သူကစပြီး ရွှေဥာဏ်တော် စူးရောက်ခဲ့တယ်မဆိုနိုင်ဘူး။ အောင်မှတ်တို့ ညီအစ်ကိုတတွေက နာမည်စီးနေတာဆိုပဲ။ ဒါကြောင့် အောင်မှတ်ကလေး လိမ္မာကျိုးနွံလာအောင်၊ အသက်ရှည်ရှည်နေနိုင်အောင် နာမည်ပြောင်းမှဖြစ်မှာတဲ့။ ပြောင်းမယ့်နာမည်ကိုလည်း ရှည်ရှည်ဝေးဝေး တွက်ချက်စဉ်းစားမနေကြတော့ပါဘူး။ ဘယ်သူက စလိုက်မှန်း မသိတဲ့ နာမည်တစ်ခုက တမဟုတ်ခြင်း တောမီးလို ပြန့်နှံ့သွားတော့တယ်။ တစ်ခါတည်း နာမ်နှိမ်ပြီးသားဖြစ်အောင် ဆိုပြီး ခွေးနီစပ် လို့ပဲ အလွယ်တကူ ပြောင်းမှည့်လိုက်ကြပါတော့တယ်။

အံ့သြစရာကောင်းတာကတော့ နာမည်ပြောင်းပြီး နောက်ပိုင်းမှာ ခွေးနီစပ် တစ်ဖြစ်လဲ အောင်မှတ်ကလေးဟာ အကျင့်နဲ့ စိတ်ဓါတ်တွေ တစစပြောင်းလဲလာခဲ့တယ်ဆိုပဲ။ ဒါပေမယ့် တစ်ခါတစ်ရံတော့လည်း ငုတ်နေတဲ့ညဉ်ဆိုးတွေက ပေါ်လာတတ်သေးတာပေါ့။ အသက်အရွယ်လည်းရလာခဲ့ပြီ။ သားနဲ့ မယားနဲ့တွယ်တာနှောင်ငင်စရာတွေတိုးလာခဲ့ပြီ ဆိုတော့လည်း အရင်ကလောက်တော့ မဆိုးတော့ဘူး ဆိုရမှာပေါ့။

                                    @@@@@@@@@@

မဆိုးတော့ဘူး ဆိုတာတောင် ဦးခွေးနီစပ်ကြီးနဲ့တော့ ဘယ်သူမှ မပတ်သက်ချင်ကြပါဘူး။ ကုန်ကုန်ပြောရင် သားသမီးတွေကတောင် သူတို့အဖေနှင့် မျက်နှာချင်းဆိုင်ရဖို့ဆို သတိဆွဲနေပြီးသားပဲ။ စိတ်က အပြောင်းအလဲမြန်ပြီး တယူသန်ဆန်သလောက် သူစိတ်တိုင်းမကျရင် ဒေါသကရှေ့ကို ကြိုရောက်နေနှင့်တတ်တာ။ ကြိုးကြောင်းသင့်ပြောပြရုံနဲ့ ငြိမ်းငြိမ်းချမ်းပြီးပြတ်ရမယ့် ကိစ္စဟာ သူတို့အဖေ ငါတကော ကောတာနဲ့ အော်ကြီးဟစ်ကျယ်၊ ရပ်ကျော်ရွာကျော်ဖြစ်ရတာတွေလည်း အကြိမ်ကြိမ်။

``ငါမွေးထားလို့ လူဖြစ်လာတဲ့ ဟာတွေက…လူပါးဝတယ်´´

မိဘကို လူပါးဝတယ်ရယ်တော့ ဘယ်ဟုတ်ပါ့မလဲ။ ကိုယ့်အရွယ်နှင့် အတွေ့အကြုံအရ အသိအတွေးကိုယ်စီ ရှိနေကြပြီမို့ ထားရာနေ၊ စေရာသွားတော့ မနေနိုင်ကြဘူးလေ။ ကိုယ်ယုံကြည်ရာနှင့် သွေဖယ်နေလျှင် သားသမီးပေမယ့် မိဘကို ကျိုးကြောင်းသင့် ငြင်းဆိုရှင်းပြခွင့် မရှိရဘူးလား။

``ငါ..မင်းတို့ထက်ပိုသိတယ်။ ငါပြောသလိုသာလုပ်´´
``အာ…ကျွန်တော်တို့ သိတာတွေကိုတော့ အဖေမသိပါဘူး´´

နှုတ်လှန်ထိုးရကောင်းလားရယ်လို့ ဆွေ့ဆွေ့ခုန်၊ ဒေါသအုံကြွလျှင် လှံဆွဲ၊ ဓါးဆွဲ။ လက်ထဲပါလာတဲ့လက်နက်နှင့် မဆင်မခြင် လက်လွတ်စံပါယ် ပစ်လွှတ်၊ ခုတ်ပိုင်းမယ် ကြံခဲ့ဖူးတာလည်း အကြိမ်ကြိမ်မို့ စကားချေတင်ကြုံရတိုင်း ပြေးလမ်းကို လေ့လာထားပြီး မျက်ခြည်မပြတ်စေရအောင် ကျီးကန်းတောင်းမှောက် ကြည့်ထားရသေးတာ။ ဦးခွေးနီစပ်ရဲ့ သားသုံးယောက်စလုံး အိမ်ပေါ်ကနေ အကြိမ်ကြိမ် ဆင်းရဖူးကြတဲ့သူချည်းပဲ။ သမီးငယ်ကတော့ရှင်းတယ်။

``အဖေနဲ့နေရတာ စိတ်ဆင်းရဲတယ်´´

ပြောပြီးမကြာဘူး။ တရပ်ခြားက အခြေအနေမဲ့တစ်ယောက်ကို စွန့်စွန့်စားစား လက်ထပ်ယူပြီး ကောက်ကောက်ပါအောင် လိုက်သွားလိုက်တာ။ အိမ်ထောင်နှစ်ဆက် ပြောင်းခဲ့ပြီဆိုတာတောင် သတင်းပဲလှမ်းပို့တယ်။ လူကတော့ ဒီနေ့ထိ အရိပ်တောင်လာမပြဘူး။ ဦးခွေးနီစပ်ကလည်း မလျှော့ဘူး။

``ငါ့ အိမ်ရိပ်နင်းရင် ဓါးနဲ့ပိုင်းမယ်မှတ်´´

လမ်းထဲမှာလည်း ဦးခွေးနီစပ်ဆိုလျှင် ရွံကြောက်ကြီးဖြစ်ကို ဖြစ်လို့ပါ။ ဘာအကြောင်းကိစ္စရှိလို့မှ ဆန့်ကျင်စကား မပြောရဲဘူး။ ကိုယ့်မြေပေါ် ကျူးကျော်ခြံခတ်လာလည်း ခပ်တင်းတင်းမပြောရဲဘူး။ မျက်နှာချိုသွေးပြီး လေပြည်ထိုးရတယ်။ ဦးခွေးနီစပ်ကတော့ မျက်စေ့ထဲ ရိပ်ခနဲမြင်တာနဲ့ ရန်လုပ်ပြီးသားပဲ။ လမ်းထိပ်အုတ်ခုံပေါ် ညဘက် ဂစ်တာတီး၊ သီချင်းဆိုတဲ့ကလေးတွေကို လေးခွနဲ့ ပစ်လွှတ်တယ်။ အိမ်ရှေ့ဆွမ်းဆန်ရပ်တဲ့ သီလရှင်လည်း ရန်တွေ့လွှတ်တာပဲ။ ကိုယ်တိုင်ပင့်ထားလို့ အိမ်မှာ ဆွမ်းခံကြွနေကျကိုယ်တော်လည်း စိတ်အဆင်မပြေတဲ့နေ့မှာ ကန်တော့ဆွမ်းပဲ။ အလှူခံလာရင် စေ့စေ့ပေါက်ပေါက် စစ်မေးနေတာ အကြာကြီး။ ပြီး…

``ခင်ဗျားတို့ လူလိမ်တွေ´´

…ဆိုပြီး နှင်ချင်နှင်လွှတ်တတ်တာ။ သာမှု၊ နာမှုမှန်သမျှ စိတ်လိုမှ ရောက်လေ့ရှိတယ်။ စိတ်မလိုရင် ဘယ်သူ့ကိုမှ အားနာမျက်နှာပူနေတာတွေ၊ ဘာတွေမရှိဘူး။ ခပ်တည်တည်ပဲ။ လစဉ်ထည့်ဝင်နေကျ ရပ်ကွက်မီးကင်းကြေးတောင်….

``နေစမ်းပါဦး။ မင်းတို့ကောင်တွေ ကိုယ်အိမ်ကအိပ်ယာကနေ ကင်းတဲပေါ်ကအိပ်ယာဆီ ပြောင်းအိပ်နေတာကို ငါတို့က ပိုက်ဆံပေးရမှာလား´´
``အဲဒါဆို ဦးလေး လာပြောင်းအိပ်ပါလား´´

မီးကင်းလခကောက်တဲ့သူက မရူးမကောင်းနဲ့ ခံပက်တော့ ရှူးရှူးရှားရှားနဲ့ ထုံးစံအတိုင်း အိမ်ထဲဝင်ပြီး ဓါးရှာနေတုန်း အပြေးကောင်းခဲ့လို့သာပေါ့။ ကိုယ်ထူကိုယ်ထ လမ်းခင်းရအောင်ဆိုလည်း…

``ငါ မထည့်ဘူး။ ငါ့အိမ်ရှေ့လမ်းနေရာ ကွက်ချန်ထားခဲ့လိုက်´´

…..ဆိုပြီး ကပ်ဖဲ့လုပ်နေတတ်ပြန်ရောလေ…။

မိန်းမနဲ့လည်း ဒီလိုပဲ။ စိတ်ကောင်းဝင်နေစဉ်တော့ `ဖေကြီးရေ၊ မေကြီးရေ…´ ပါပဲ။ ခဏနေကြရင် ဆူဆဲပွက်လောညံကြရော။ ရိုက်နှက်အော်ဟစ်သံ၊ ကယ်ပါယူပါ ငိုညည်းသံတွေနဲ့ အုန်းခြိမ့်ခြိမ့်ညံပြန်ရော…။ ရွာရိုးစုန်ပြီး မိန်းမကို ဓားနဲ့လိုက်၊ လှံနဲ့ပစ် ဆိုတာလည်း မကြာခဏ။ သူ့မိန်းမ မချိုအေးတစ်ယောက် သူများအိမ်မှာ ပုန်းအိပ်ခဲ့ရတာတွေလည်း အကြိမ်ကြိမ်ရှိခဲ့တာပါ။

ခုတော့ သားတွေတင်မက မြေးတွေတောင် အရွယ်ရောက်လာခဲ့ပြီဆိုတော့ အရင်လောက်တော့ မဟုတ်တော့ပါဘူးလို့ ဆိုကြပြန်ပြီ။

                                    @@@@@@@@@@

ဦးခွေးနီစပ်ကြီးအိမ်က ဆွမ်းကျွေးအလှု ဖိတ်စာကလေးရောက်လာတော့ တစ်ရပ်ကွက်လုံးက အံ့သြတကြီး စိတ်ဝင်တစားရှိခဲ့ကြတာပါ။ ဖိတ်စာရဲ့ အတွင်းထဲမှာတော့…

ဦးအောင်မှတ်+ ဒေါ်ချိုအေး

...တဲ့။ ဦးခွေးနီစပ်ရဲ့ ဆန္ဒအတိုင်း ထည့်ပေးထားတာပါ။ သားတွေ၊ သမီးတွေ မင်္ဂလာဆောင်ဖိတ်စာတွေမှာ ကတည်းက `ဦးအောင်မှတ်´လို့သာ ရေးစေချင်ခဲ့တာ။ ဒါပေမယ့် သင်းတို့က…

``အာ…အဖေ့ကို တစ်ရပ်ကွက်လုံးက သိနေကြတာဦးခွေးနီစပ် ပဲကို။ တော်ကြာ အဖေ့သားသမီးမှန်း သိတဲ့လူကသိ။ မသိတဲ့လူက မသိနဲ့ မင်္ဂလာဆောင် မှာ ဧည့်သည်နည်းနေပါ့မယ်´´

ဟုတ်သော်ရှိ၊ မဟုတ်သော်ရှိ မတော်လို့ ဧည့်သည်အလာနည်းနေလျှင် ကိုယ့်အပြစ်ဖြစ်လာဦးမှာ စိုးရသည်မို့ အလျှော့ပေးခဲ့ရတာချည်းပင်။ ဦးခွေးနီစပ်ု(ခ) ဦးအောင်မှတ်…တဲ့။ မနှစ်မြို့နိုင်ပေမယ့် ကျေနပ်ခဲ့ရတာပေါ့။ ခု…အလှူကတော့ ကိုယ့်စိတ်တိုင်းကျ ကိုယ့်အလှူ၊ ကိုယ့်သဘောပဲ။ သူမှန်းမသိလို့ မလာချင်လည်း နေကြပေတော့။ လာသလောက် ဧည့်သည်တွေကိုပဲ သူ့ကိုယ်သူ ဦးအောင်မှတ်အဖြစ် အသိမှတ်ပြုစေရတော့မှပဲ။

ဒါပေမယ့် ဆရာတော်ကတရားပေးတော့လည်း…

``ဒီကနေ့ ဒကာကြီး ဦးခွေး၊ အဲ… ဦးအောင်မှတ်ရဲ့ အသက်ခြောက်ဆယ်ပြည့် မွေးနေ့ဆွမ်းကျွေးအလှူ….´´

..ဆိုတော့ မခက်ပေဘူးလား။ ရေစက်ခွက်ကြီးရှေ့ချထားပြီး ဦးအောင်မှတ် ကျွဲမြီးတိုမိတယ်။ ဒီဆရာတော်ဟာ အသေအချာ လျှောက်ထားပန်ကြားခဲ့လျှက်နဲ့ စကားမှားဖြစ်အောင် မှားရသေးတယ်။

ဆရာတော်၊ သံဃာတော်တွေကို ဆွမ်းကပ်အပြီး ဝေးနီးဆီမှ ရောက်လာချီးမြှင့်ကြတဲ့ ဧည့်သည်တွေကို သေသေချာချာ ဧည့်ခံကျွေးမွေးတယ်။ အေးအေးဆေးဆေး တစ်ဝိုင်းချင်းကုိ ရှင်းပြတောင်းပန်ခဲ့တယ်။ ဒီနေ့အလှူက သူ့ရဲ့အသက်ခြောက်ဆယ်ပြည့် မွေးနေ့အလှူလည်းဖြစ်သလို ဦးအောင်မှတ်နာမည် ပြန်လည်အတည်ပြုရေး ကင်ပွန်းတပ်မင်္ဂလာလည်း ဖြစ်တဲ့အကြောင်း….။ နေ့မြင်ညပျောက် သေကာလ၊ ပျောက်ကာလ လူ့ဘ၀မှာ နေစရာနေ့ရက်တွေ သိပ်ကျန်တော့မယ်ဟု မမျှော်လင့်နိုင်ကြကြောင်း၊ သူကတော့ ကျန်ရှိသေးတဲ့ ဘ၀ရဲ့နေ့ရက်ကလေးကို ဦးအောင်မှတ်ဆိုတဲ့ အမည်ကောင်းတစ်မျိုးတည်းနဲ့သာ ဆက်လက်ရှင်သန် ချင်တော့ကြောင်းတွေ…. ဝေေ၀ဆာဆာပြောခဲ့လေရဲ့။

ပြီးတော့…ဦးအောင်မှတ် ဘ၀တုန်းက မိဘဂုဏ်ရှိန်နဲ့ လျှမ်းလျှမ်းတောက် လူဇော်လုပ် နေခဲ့ရတဲ့ ဘ၀နေ့ရက်တွေကိုလည်း ပြန်ပြောင်းတမ်းတမိသေးရဲ့။ ခွေးနီစပ်ဆိုတဲ့ နာမည်ကို ရခဲ့ချိန်ကစလို့ သူ့စိတ်ထဲမှာ သိမ်ငယ်နိမ့်ကျနေခဲ့ရတာ ဘယ်သူမှစာနာနိုင်မှာမဟုတ်။

သူ့ ပတ်ဝန်းကျင်မှာ နာမည်ပြောင်တစ်ခုနဲ့ တစ်သက်လုံး နေသွားခဲ့ကြသူတွေ အများအပြား ရှိနေခဲ့တာလည်း သူ… သိပါရဲ့။ ဒါပေမယ့် အဲဒီနာမည်တွေဟာ ကာယကံရှင်ကို ချစ်နိုးစိတ်နဲ့ ကျီစယ်ခေါ်ဝေါ်ခဲ့ကြရင်း တွင်ကျယ်လာခဲ့ ကြတာပဲ။ သူ့နာမည်ဟာ သူ့အတွက် ချစ်စနိုး ကျီစယ်လိုစိတ်နဲ့ ပေးထားတဲ့ နာမည်မျိုး ဆိုရင်တော့ ဘယ်လို အကောင်ပလောင်၊ တိရိစ္ဆာန်နာမည်ဖြစ်ပါစေ။ သူ… ကျေကျေနပ်နပ် ခံယူချင်ပါရဲ့။ အခု… သူ့နာမည်ကျတော့ သူ့ဘ၀တစ်လျှောက်လုံး ဆိုးမိုက်ရမ်းကားခဲ့၊ အနိုင်ကျင့် ဗိုလ်ကျခဲ့သမျှ ခံခဲ့ကြရသူ၊ တစ်နွယ်ငင်၊ တစ်စင်ပါ ရန်ငြိုးသိုဖွဲ့သူတွေက လိမ္မာစွာ ဆန့်ကျင်ကာ၊ သူ့အပေါ် နိုင်သလောက်အားနဲ့ လက်စားချေ တုန့်ပြန်ခဲ့ကြတာ။ တပြန် ဖိနှိမ်နိုင်စားခဲ့ကြတာ မဟုတ်လား။ ဒါကြောင့်သာ ဒီ နာမည်ပြောင်ဟာ တစ်ယောက်ကစ၊ တစ်ရာမကတော့ပဲ ပတ်ဝန်းကျင်အနှံ့ အလွယ်တကူ ပျံနှံ့တွင်ကျယ်ခဲ့တော့တာ။

                        သူ့မှာတော့ အချိန်တိုင်း ရှက်ရွံ့နာကျင်နေခဲ့ရတာ။ နာကျည်းနေခဲ့မိတာ။ သူ့အပြုအမူ၊ သူ့နေထိုင်မှုဟန်ပန်တွေဟာ ဘုကလန့်၊ လူ့ဂွစာတစ်ယောက်လို မူမှန်ဖြစ်မနေပြန်တာလည်း သိပါရဲ့။ ဒါပေမယ့် ကိုယ့်ကိုယ်ကိုယ်မှ မကျေနပ်နိုင်တဲ့ လူတစ်ယောက်ဟာ သူတပါးကျေနပ်အောင် နေပေးစရာလိုလို့လား။ နေလည်း မနေတတ်ခဲ့ပါဘူး။

အသက်အရွယ်ကလေး ရလာခဲ့တော့မှ အတွေးတွေ တဖြည်းဖြည်း ပြောင်းလာခဲ့တော့တာ။ ဆင်းပဲ ရဲရဲ၊ ချမ်းပဲသာသာ ကိုယ့်ဂုဏ်ကလေးကို ကိုယ်ဆယ်လို့ ဦးအောင်မှတ်ဘ၀နဲ့ပဲ တင့်တောင့်တင့်တယ် သေပါရစေတော့။

တပျော်တပါး၊ အားပါးတရ စားသောက်ရယ်မောနေကြတဲ့ ဧည့်ပရိတ်သတ်ကလည်း ဦးအောင်မှတ်ရဲ့ စိတ်ကူးနဲ့ ရည်ရွယ်ဦးတည်ချက်ကို ခုမှ နားလည်စာနာနိုင်ကြတော့တဲ့ပုံနဲ့…

``ဦးအောင်မှတ် သက်တော်ရာကျော်ရှည်ပါစေ

…ပေါ့။ အားလုံးရဲ့ နှုတ်ဖျားမှာ ဦးအောင်မှတ်ဆိုတဲ့နာမည်က တွဲလဲခို၊ ရေပမ်းစားနေပြန်တာကို ဦးအောင်မှတ်တစ်ယောက် ဂွမ်းဆီထိသလို၊ ရွှန်းပီတိတွေ တအိအိစိုနေတုန်းမှာပဲ….

``အား..ကောင်းလိုက်တဲ့ ၀က်သားဗျာ။ စားကောင်းကောင်းနဲ့ စားလိုက်တာ စူစကာဗိုက်ဖြစ်နေပြီ။ အင်း… ပြန်လိုက်ဦးမှ..ကိုခွေးနီစပ်ရေ….

ပြောတဲ့သူက အမှတ်မဲ့ပေမယ့် ဦးအောင်မှတ်က ဧည့်ပရိတ်သတ်အလည်မှာ သပြေသီးမှည့်ရောင် မျက်နှာညိုကြီးနဲ့၊ မျက်ထောင့်ကြီးနီလို့။ ပါးစပ်ကလည်း အယုတ္တ၊ အနတ္တတွေ တရစပ် မရပ်မနား ဆဲရေးရေရွတ်ပစ်လိုက်တာ ပွဲကို ပျက်ကရောတဲ့။

                                    @@@@@@@@

ခုတော့ အလွယ်တကူ ပျက်စီးခဲ့ရတဲ့ နာမည်တစ်ခုကို ပြန်ပြင်၊ အဖတ်ဆယ်ဖို့ တစ်ဘ၀စာလုံး အတင်းအကျပ် ကြိုးစားခဲ့ရတဲ့ ဦးခွေးနီစပ်ကြီးတစ်ယောက် ဆုံးပါးကွယ်လွန် ခဲ့ရှာပါပြီ။ နာရေးဖိတ်စာမှာ…၊ နာရေးမှာ ဧည့်ပရိတ်သတ်ကို ကမ်းတဲ့ယပ်တောင်မှာ… `ဦးခွေးနီစပ်(ခ)ဦးအောင်မှတ်´လို့ပဲ ဖော်ပြထားပါတယ်။ သရဏဂုံတင်တဲ့ ဘုန်တော်ကြီးရဲ့ ရေစက်ချတရားတော်ထဲမှာလည်း ဦးခွေးနီစပ်(ခေါ်) ဦးအောင်မှတ်ပါပဲ။

“ငါသေရင် မီးသဂြိ င်္ုလ်ပစ်ပြီး ဘာအရိုးပြာမှ ကောက်ယူ ဂူတည် မနေနဲ့။ အို.. ကုန်ကုန်ပြောမယ်။ ငါ့နာမည်နဲ့ ပတ်သက်သမျှ ဘာ…လက်စလက်နမှ မကျန်ခဲ့ချင်ဘူး… ရှင်းလား”

အခုထိတော့ ဦးခွေးနီစပ်ကြီးအကြောင်း စကားစပ်ဆိုင်လို့ ပြောဖြစ်ကြရင် ဦးခွေးနီစပ်ဆိုတဲ့ နာမည်ကိုပဲ သုံးစွဲပြောဆိုနေကြတုန်းပါပဲ။

လူကြီးမင်းများခင်ဗျာ…အိမ်ထောင်မှု၊ ဘုရားတည်၊ ဆေးမင်ရည် စုတ်ထိုး ဆိုတဲ့ `နောင်ပြင်ရန်အခက်  တွေထဲမှာ `နာမည်ဆိုး´ဆိုပြီး နောက်တိုးတစ်မျိုး မပါဝင်ခဲ့ဖူးတာ သေချာပါရဲ့လား။ ။

                                                                            သတိုး





Sunday, April 3, 2011

ပန်ပါ

ဝါရွှေရောင်ပိတောက်ဖူးတို့ တစ်ကြိမ်ဖူးပွင့်ခဲ့ပြီးဖြစ်သော်လည်းသင်္ကြန်ကျရန် ရက်အနည်းငယ်လိုပါ သေးသည်။
မျှော်လင့်သောသင်္ကြန် ရောက်မလာသေးသော်လည်းတူးပို့..တူးပို့… သင်္ကြန်ဒိုးသံများကတော့ ဒီနှစ်မှ ပိုလို့တောင်မြူးကြွမြိုင်ဆိုင်နေသလိုပင်။

``ဒီနှစ် သင်္ကြန် ငါအရောက်ပြန်လာခဲ့မယ် မီ´´

ညီ့ထံမှ စေပါးလိုက်သော အမှာစကားကို ရရှိ၊ ကြားသိပြီးချိန်မှစလို့သင်္ကြန်ကျဖို့ မီ…မျှော်မောစိတ်စော နေခဲ့ပါသည်။

ခြံထောင့်က ပိတောက်ပင်ကြီးမှာ ပိတောက်ဖူးလက်ကျန်တို့ စိမ်းမြမြ၊စီရရီကျန်ရှိနေသေးသည်။ စိမ်းညိုစိုလက် အရွက်ဖားဖားတို့ကြားမှ ရွှေဝါအဆင်းနှင့် ၀င်းလက်ပွင့်ဖူးလာ တော့မည့် ပိတောက်ပန်းတို့ ကလည်း ညီပြန်ရောက်အလာကိုစောင့်ကြိုငံ့လင့်နေကြသည်ထင့်။

* * *

မီ နှင့် ညီတို့သည် ငယ်နုစဉ်ကလေးဘ၀မှာကတည်းက ဒီပိတောက်ပင်ကြီးအောက်မှာအတူဆော့စား ကြီးပြင်းလာခဲ့ကြပါသည်။ ဒါပေမယ့် …ညီခူးပေးသော ပိတောက်တစ်ခက်ကိုဖြင့် မီ တစ်ခါဖူးမျှ မပန်ဆင်ခဲ့စဖူး။

``ညီရေ….ပိတောက်တွေ ပွင့်တော့မယ်နော်´´

ညီကတော့ အရေးမထားစွာ``အင်း´´ တစ်လုံးထက်မပိုတတ်ခဲ့။

``ညီရေ…ငါတို့ခြံမှာ ဒီမနက် ပိတောက်တွေ စပွင့်တယ်´´
``ဟုတ်လား..။လာ…သွားကြည့်ရအောင်´´

…ရယ်လို့ ညီ..ဘယ်တော့မှ မဆိုခဲ့ပါ။

``ညီရယ်…လာပါ။မီ့ကို ပိတောက်ပန်းတွေ ခူးပေးစမ်းပါ´´

..ဟုတော့ မီ့နှုတ်က အတင်းအကျပ် ထုတ်ဖေါ် မတောင်းဆိုချင်ခဲ့ပေ။ မီလည်းပဲမိန်းကလေးပီပီ ပန်းကြိုက်တတ်သေးသော်လည်း ကေသာရွရွ ပန်ဆင်ရန်အတွက်တော့ဘယ်တုန်းကမှ စိတ်ကူးတရ ရှိခဲ့ဖူးတာမဟုတ်။

ဒါပေမယ့် မီ့ဖို့ရယ်လို့ ညီကစိတ်လိုလက်ရ ခူးလာပေးခဲ့လျှင်တော့အမှန်တကယ် ၀မ်းမြောက်ပျော်ရွှင်မည့် သူဖြစ်ပါသည်။ ညီ ခူးယူပေးသော ပိတောက်ပန်းတို့ကို အဦးဆုံး ဘုရားမှာ ကပ်လှူပူဇော်မည်။ ပြီး…မီ့ အိပ်ခန်းပန်း အိုး လေးမှာ လှပဝေဆာစွာ ထိုးစိုက်ထားဦးမည်။ညီကမီကို ပန်စေချင်သည်ဆိုလျှင်တာ့ ကေသာဆံစပ်မှာ တစ်ပွင့်၊တစ်ခက်ထိုးစိုက်ပန်ဆင်ကာ အမူပို အပြုံးနှင့် ငြူစူရောင်ပြုမိဦးတော့မည်။

ဒါပေမယ့်…ညီသည် ပိတောက်ဝါတို့ ဖူးပွင့်လေတိုင်း မီ့ကို တစ်ကြိမ်တစ်ခါမျှ သတိမရခဲ့ပါပေ။

* * *

``ဟယ်…ညီ၊ ပိတောက်ပန်း တက်ခူးနေတာလား´´
``အင်း……´´

မီတို့နှစ်ယောက်သားထို့ထက်ပု၍ စကားမဆိုဖြစ်ကြတော့။ သူ..အပင်ပေါ်မှခူးယူချွေချပေးသော ပိတောက်ခက်တွေကို မီက တစုတစည်းတည်းဖြစ်အောင်ကောက်ယူစုဆောင်း ပေးထားရသည်။ ပြီး ရွှေဝါရောင် ပိတောက်ပွင့်ဖတ်တို့နှင့်လိုက်ဖက်သင့်တော်ရုံ အနေတော်ဖယ်ချန်ကာ အရွက်စိမ်းစိမ်းတွေကိုချွေပစ်ရသည်။ ညီက ထိုပိတောက်ဝါတို့ကို လှလှပပစည်းနှောင်ထုတ်ပိုး နေ တော့  လည်း ဘေးကကူညီ၊ကြည့်ပေးရုံပင်။ ဘယ်သူ့အတွက်လဲရယ်လို့ မီမမေးပါ။ မေးနေစရာ လိုသေး လို့လား။ မီဖို့မဟုတ်တာ သေချာနေပြီးသားပဲလေ။

``မီ…ဒီည ….နင်တို့ ယိမ်းအက တိုက်ရဦးမှာလား´´
``အင်းလေ…..´´
``ညကျရင် နင့်ကို ငါလိုက်ပို့ပေးမယ်´´

မီ့နှုတ်ခမ်းတွေ မဲ့ကွေးထားပြလိုက်သည်။ သူကများ မီ့ကိုသင်္ကြန်ယိမ်းတိုက်နေသော ရပ်ကွက်ဓမ္မာရုံဆီ လိုက်ပို့ပေးဦးမလို့တဲ့။

ညီတို့အကြောင်းကို မီက နောကျေနေအောင်သိထားပြီးသူမို့ မယုံကြည်ပါ။ မီတို့ယိမ်းအဖွဲ့မှ တစ်ယောက်ယောက်ကို ညီ…ပတ်သက်ရန်ကြိုးစားနေတာဖြစ်ရမည်။ မီ့အထင်မမှားဘူးဆိုလျှင်ဒီနှစ်ခရိုင်သင်္ကြန်မယ်ဆုအတွက် လျာထားတစ်ပေးခံထားရသော `ရွှေရည်´´ဖြစ်နိုင်ပါသည်။

အဲဒီညနေ ညီ့ဆိုင်ကယ်ပေါ်က မီအဆင်း၊ ဓမ္မာရုံထဲဝင်ရောက်ပြီးခဏအကြာမှာပင် ရွှေရည်တို့အုပ်စု ရောက်လာခဲ့ကြတော့ ပိတောက်ပန်းတွေ ထိန်ဝါဝေလို့ပင်။

``မီ…ပန်ဦးမလား´´

ရွှေရည်ကမေးတော့….

``ဟင့်အင်း…။ အဲဒါ မီတို့ခြံထဲက ပွင့်တာလေ….။ မီက ပန်းမပန်တတ်လို့……´´

တကယ်လည်း မီက စင်ပေါ်မှာ ဧည့်ခံကပြနေစဉ် ပန်ထားရသော ပိတောက်ပန်း အတုကိုတောင် စင်အောက်ရောက်သည်နှင့် ဆွဲဖြုတ်ပစ်တတ်သူမို့ယိမ်းခေါင်းဆောင်ဆရာမ၏ ဆူပူကြိမ်းမောင်းခြင်းကို အမြဲခံယူ နေရသူဖြစ်လေသည်။


* * *

“ရွှေရည်က လှတယ်မဟုတ်လား…မီ”
““အဲတော့ ဘာဖြစ်လဲ”

မီ့မျက်စောင်းတို့ သူ့ထံလွင့်ခနဲ ရောက်လေလျှင် သူက လှစ်ခနဲပြုံးလိုက်ကာ ….

“သင်္ကြန်အတက်နေ့ကျမှ ငါ့ကို အဖြေပေးမှာတဲ့”
“…………………..”
“ငါ ဈေးဆစ်တာပေါ့။ ဒါပေမယ့် မရပါဘူးဟာ…”
“အဲဒါ…ငါနဲ့ဆိုင်လို့လား….”
“နင်ကလည်း….အသားလွတ်ကြီး စွတ်အော်နေစရာလား။ ငါကဆိုးတိုင်ပင်၊ကောင်းတိုင်ပင် သူငယ်ချင်း တွေမို့ နင့်ကိုပြေပြတာ….”

မီ့လေသံ အနည်းငယ်လျှော့ချရတော့သည်။ သို့သော်…

“အဲဒါတွေ ငါ့ လာမပြောနဲ့…“

ဒါပေမယ့် ခဏနေတော့လည်း ဒီစကားတွေဆီပဲ ပြန်ဦးတည်လာပြန်တော့တာပင်။

အဲဒီရွှေရည်ဟာ ရုပ်ကလေးလှသလောက် အထာအမျိုးမျိုးနဲ့ စိတ်ကစားတတ် သေးတာ။ ညီအပါအ၀င် သူမကုိ ပတ်သက် နွယ်ငင်လာသူမှန်သမျှကို မျှတစွာအရောတ၀င်နေတတ်သူဆိုတာ ညီမသိဘူးလား။ သိလည်းပဲ ညီ ဂရုစိုက်လိမ့်မည် မထင်။ မီကလည်း သူတပါးမကောင်းသတင်းပြောရန် နှုတ်တွန့်ဝန်လေးလှပါသည်။

ဒါပေမယ့် ညီဟာ ရွှေရည့်အပေါ် ဘယ်လောက် စွဲလန်းခဲ့ပြီလဲ မသိ။ အဲဒီလိုဆိုလျှင်တော့ ညီ ခံစားနာကျင်ရ တော့မှာ သေချာသည်။

ညီ့နှလုံးသားမှာ ဒဏ်ရာအနာတရဖြစ်ရမှာမျိုးတော့ မီမလိုလားတာအမှန် ။ ဒါပေမယ့်….

“ငါ……ရင်တွေခုန်နေတယ် မီရဲ့”
“ဖြစ်တတ်တာပဲလေ…..”
“အံမယ်…..နင်က ဆရာမကြီးစတိုင်နဲ့။ နေစမ်းပါဦး။ နင်က ဘယ်တုန်းက အဲလိုခံစားဖူးလို့လဲ”
“ဆယ်တန်းအောင်စာရင်း စောင့်ကြည့်ကြတဲ့ ညတုန်းကလေ………”
“အာကွာ……။ အောင်စာရင်းရင်ခုန်တာနဲ့ ဘာမှမဆိုင်ပါဘူး…။ တစ်မျိုးစီပဲ ။ သိလည်းမသိပဲနဲ့…..”
“ဟုတ်ကဲ့။ ကျွှန်မကတော့ မသိနားမလည်ပါဘူး လူကြီးမင်းရယ်…။ ဒါပေမယ့် တစ်ခုတော့သတိပေးလိုက်ပါမယ်နော်။ ဘယ်သူ့ဆီကမှ အများကြီးမျှော်လင့်မထားပါနဲ့။ ကဲ…… ကြွပေတော့။ နားငြီးတယ်…………”

* * *

“ယိမ်းနွဲ့ကာ တီးကွက်နဲ့အတူ က…စဉ်……လက်ခုတ်သံ စည်းချက်လိုက်မှာလား…………”

စင်ပေါ်မှာ မီတို့အဖွဲ့ ပြိုင်ပွဲဝင်နေစဉ်ကတည်းက ပရိတ်သတ်ကြားမှာ ညီ့ကိုလှမ်းတွေ့လိုက်သေးသည်။

သီချင်းပြီး၍ စင်အောက်ပြန်ဆင်းတော့ မီတို့ကို လှမ်းတွေ့မြင်သာရုံခပ်ဝေးဝေး ကနေ ကြည့်ငေးနေတာ တွေ့ရပြန်သည်။ ရွှေရည့် သူငယ်ချင်းတွေက ရွှေရည့်ကို သတင်းလှမ်းပို့ရင်း တွတ်ထိုးနေကြတာကို မီက ဂရုစိုက်မနေပဲခေါင်းပေါ်က ပိတောက်ပန်းခြောက် အတုတွေကို ဖြုတ်ပစ်ရန် ကြိုးစားနေမိသည်။

“မီ….ပန်းတွေကို ဖြုတ်ပစ်နေပြန်ပြီလား။ နောက်တစ်ကြိမ်ပြိုင်ပွဲဝင်ဖို့ရှိသေးတာ သိသားနဲ့။ အဲဒီကလေးမ ကတော့…..”

မီ မျက်နှာကြီးမအီမလည်နှင့် စူပုတ်နေရတော့သည်။

“မီ…ဘာဖြစ်နေပြန်တာလဲ…”
“ငါ ဆူခံထိထားတာ နင်မကြားဘူးလား”
“ကြားတယ်လေ။ နင်ကလည်းနင်ပဲကို……….”
“ငါ ဇက်ညောင်းလို့………..”
“အပိုတွေ…..။ ညီက နင့်ကို အရေးမလုပ်ပဲ ရွှေရည့်ကိုပဲ ခစားနေလို့မဟုတ်လား…..”
“မိနွယ်နော်….။ငါ စိတ်တိုနေတာ။ မဟုတ်တာတွေ လာမပြောနဲ့”
“ကဲပါ။ မပြောနဲ့ဆို မပြောပါဘူး။ ရော့….အချိုရည်ဗူး ယူလိုက်ဦး။ဒီမှာမုန့်လည်းစား…..။ ဒီည ညည့်နက်လိမ့်မယ် ထင်တယ်ဟ…”

မီ တကယ်ပဲ ဗိုက်ဆာနေတာမို့ မိနွယ်လက်လှမ်းသော မုန့်ကို ပလုတ်ပလောင်း စားကာ အချိုရည်နှင့် မျှောချနေလိုက်သည်။

“ဟဲ့ ..ဟိုမှာတွေ့လား။ ဒီအချိုရည်နဲ့ မုန့်လာကြွေးတဲ့ အန်ကယ်လ်နဲ့အန်တီတို့ လင်မယားလေ… ။ သူတိုကဘေးက တစ်ယောက်က သူတို့သားတဲ့…အမိုက်စားပဲဆရာ……“
“………………..”
“နင့် ညီတော့ ခံရပြီထင်တယ်။ အဲဒီတစ်ယောက်က ရွှေရည်နဲ့ ဘာလိုလိုပဲတဲ့။သူ့သူငယ်ချင်းတွေ ၀ိုင်းစနေကြတာ…”

မီ သောက်လက်စ အချိုရည်တောင် သီးသွားရလေသည်။

* * *

သင်္ကြန် အတက်နေ့……။

ညီ့စကားအရ ရင်ခုန်မျှော်လင့်သောနေ့ ဖြစ်လေသည်။

သို့သော်………

“ရွှေရည် ပုံပြောသွားပြီ….တောက်”
“ဟဲ့..သူ့မှာ ဘာအခက်အခဲရှိလို့ရောက်မလာနိုင်တာလဲ စုံစမ်းပါဦးတော့….”
“စုံစမ်းပြီးပြီ။ သူ့ အကောင်သစ်နဲ့ ရေပက်ခံထွက်လည်နေတာလေ…”

မီ ဘာဆက်ပြောရမလဲတောင် မသိတော့။ ထိုနေ့ တစ်နေ့လုံး ညီတစ်ယောက်အိမ်ပြန်မရောက်တော့……

“မီရေ…ညီ ဘယ်တွေသွားတတ်သလဲ။ သမီးသိလား...”

ညီ့အမေက ဖုန်းဆက်မေးလေလျှင် မီလည်းမသိတတ်နိုင်။

ညနေပိုင်းမှာ မီတို့ယိမ်းအက တစ်ဖွဲ့လုံး ရေပက်ခံကားဖြင့် မြို့ထဲလည်ရန်လူကြီးများက စီိစဉ်ပေးပါသည်။

“ဟဲ့ တို့နောက်က ကပ်ပါလာတဲ့ဆိုင်ကယ်ဟာ ညီတို့မဟုတ်လား”
“ဟုတ်ပါရဲ့။ ဟဲ့ မူးနေကြပြီ ထင်တယ်”

ညီတို့ဆိုင်ကယ်သည် မီတို့ကားကု ကျော်တက်သွားလျှင်ရနိုင်လျှက်နှင့်ကျော်မတက်။ နောက်က ကပ်လိုက်လာရင်း နှုတ်ကလည်း ဘာတွေအော်ဟစ်နေမှန်းမသိ။

မီတို့ကားပေါ်မှာလည်း ကက်ဆက်က သင်္ကြန်သီချင်းတွေ ဖွင့်ပေးထား သောကြောင့်အားလုံးသံပြိုင် လိုက်အော်ဆိုနေကြရာ ဆူညံနေလေပြီ။ ညီတို့ ဆိုင်ကယ်ကိုရွှေရည်လည်း တွေ့ထားပြီးဖြစ်ပုံရကာ မမြင်ယောင် ပြုနေခဲ့လေသည်။

မီတို့၏ရေပက်ခံကား ည ရပ်ကွက်ထဲပြန်ဝင်လေမှ ညီတို့တတွေ ဆိုင်ကယ်ကုိဝူးခနဲ အရှိန်ပြင်းပြင်း မောင်းနှင်လမ်းခွဲသွားလေသည်။


* * *


မီတို့မြို့ကလေးက ညီထွက်ခွာသွားခဲ့တာ သင်္ကြန်သုံးနှစ်ပင် ဖြတ်သန်း လွန်မြောက်ခဲ့ပြီ။

ညီ မရှိတော့သော သင်္ကြန်ရက်များသည် မီအတွက် ပျော်စရာမကောင်းခဲ့ တော့ပေ။

မီတို့ ခေါင်းရင်းခြံသို့ ညီတို့သားအမိပြောင်းရွှေ့လာခဲ့ကြစဉ် မီနှင့်သူ ငါးတန်းနှစ်ကတည်းက သင်္ကြန်တွေမှာ အတူတူပျော်ရွှင်ခဲ့ဖူးကြတာ…..။

မီတို့တတွေ အရွယ်ရောက်လာချိန်မှာတော့ ညီသည် မီ့အနားမှာ အမြဲရှိ မနေတတ်ခဲ့တော့ပါ။

“ညီ…နင်တို့ရေပက်ခံထွက်ကြမလို့ဆို….”
“အေးလေ။ ဘာလဲ…နင်က လိုက်ချင်ပြန်ပြီလား….”

အမှန်တော့ မီလည်းလိုက်လည်ချင်လို့သာ စကားစမိတာဖြစ်သည်။

ဒါပေမယ့်…“နင်လည်းလိုက်ခဲ့ပါလား မီ” ဟု သူက စမခေါ်ပဲတော့မီဘက်ကခွင့်တောင်းခံပြီး မလိုက်လိုပါ။ သူကလည်း…..

“လိုက်မနေပါနဲ့ မီရယ်။ သင်္ကြန်လည်တာ မိန်းခလေးတွေအတွက် မကောင်းပါဘူး။မထော်မနန်းတွေ နင်လည်းမြင်တွေ့ နေတာပဲ မဟုတ်လား“
“ဒါဆို..နင်တို့ဆိုင်ကယ်နောက်က ကောင်မလေးတွေကျတော့ရော…“
“သူတို့က သူတို့ပဲလေ…။ နင်လိုက်မတုနဲ့…။လိုအပ်ရင် ငါကသူတို့အားလုံးကုိလျစ်လျှူရှုနိုင်တယ်။ နင်ပါလာရင်သာ ငါ နောက်ဆံငင်နေရမှာ…”
“ငါက ဘာဖြစ်နေမှာမို့လဲ…”
“နင်ကတော့ ဘာမှမဖြစ်ဘူးပေါ့။ဒါပေမယ့် …..အာကွာ။မလည်ချင်ပါနဲ့ဆိုကွာ…။ ငါနဲ့လည်းမလိုက်နဲ့..။ ဘယ်သူခေါ်လို့မှလိုက်မလည်ပါနဲ့မီရယ်…နော်။ပလိစ်….”
“…………………”
“ငါ နှစ်ဆန်းတစ်ရက်နေ့ကျရင် နင့်ကို နံနက်အစောကြီးဘုရားလိုက်ပို့ပေးမယ်ကွာ…။ ကျေနပ်တော့ ဟုတ်လား….”

ဒီလောက်ဆိုလျှင်ပင် မီကျေနပ်နိုင်ခဲ့ပါသည်။

နှစ်ဆန်းတစ်ရက်နေ့ရောက်တိုင်း မီ့အားဘုရားပို့ပေးနေကျ ညီသည်ထိုနှစ်သင်္ကြန်မှာတော့ မီ့အပေါ် ကတိပျက်ခဲ့တော့သည်။

မီကတော့ ဘုရားပေါ်မှာ ညီ့အတွက် ပန်း၊ရေချမ်း၊အမွှေးနံ့သာတိုင်သက်စေ့ထွန်းလှူကာ ညီတစ်ယောက် ကျန်းမာပကတိရှိနိုင်ပါစေကြောင်း အထပ်ထပ်တောင်းဆုချွေ နေခဲ့မိသည်။

မီတို့ ရေပက်ခံကားနောက်မှ ကပ်လျှက်လိုက်ပါလာခဲ့ကြပြီး လမ်းခွဲအထွက်မှာပင် ညီတို့ ဆိုင်ကယ်အက်ဆီးဒင့်ဖြစ်ခဲ့ကြတာ…။ ညီကဆိုင်ကယ်နောက်မှလိုက်စီးသူမို့ အဝေးကြီး လွင့်သွားကာဒဏ်ရာပုိမိုပြင်းထန်ခဲ့ပါသည်။

မြန်မာပြည် အလယ်ပိုင်းမြို့ကလေးမှာ နေထိုင်သောညီ့ဖခင်ထံ ဖုန်းဆက် ကာရန်ကုန်မှာကြိတင်စောင့်ဆိုင်း နေစေရသည်။ သတိမရသေးသော ညီ့ကိုတော့ရန်ကုန်ဆေးရုံကြီးသို့ လွှဲပို့ရန် စီစဉ်ကြရပြန်သည်။

ရန်ကုန်မှာ နှစ်လနီးပါးခွဲစိတ် ကုသအပြီး ညီတစ်ယောက် ပြန်လည် နေကောင်း ကျန်းမာလာခဲ့လျှင်တော့ မီလည်း မြိုကကလေးမှနေ ညီကိုမျှော်ရင်းမောလှပြီ။

ဒါပေမယ့် မီတို့မြို့ကလေးသို့ ညီတစ်ယောက်ပြန်ရောက်မလာခဲ့တော့ပါ။ ညီ့ ဖေဖေနှင့်မေမေက နယ်လုကြရင်း လမ်ခွဲခဲ့ကြအပြီး …ညီကသူ့မေမေနှင့်လိုက်ပါနေထိုင်ခဲ့တာ ဖြစ်ပါသည်။ ညီဆယ်တန်းအောင်ပြီးချိန်မှာ ဖခင်နှင့်တလှည့်ပြန်နေကာ တကသိုလ်ဆက်တက်စေရန်စီစဉ်ခဲ့ကြပြန်သည်။ ခေါင်းမာသော ညီက အဝေးသင်ပဲယူကာ မြို့ကလေးမှတဖ၀ါးမခွာ။

“ငါက နင်တစ်ယောက်တည်း ကျန်နေခဲ့မှာစိုးလို့ သိလား”

နောက်တောက်တောက် အပြောမှာ အမှန်တ၀က်မက ပါဝင်နေတာ မီခံစားနားလည်ကျေနပ်နေခဲ့ဖူးသည်။

အက်ဆီးဒင့် ဖြစ်ပြီးနောက်မှာတော့ မိခင်ကြောင့် ညီပျက်စီးရသည်ဟုအပြစ်တင်ဖို့ကာ အဘွားနှင့်ဖခင်က ဆေးရုံမှအဆင်းတွင် သူ့ကိုတစ်ပါတည်းခေါ်ချသွားတော့သည်။

ညီ…ဟိုမြို့ကလေးသို့ရောက်စကတော့ မီ့ထံ တယ်လီဖုန်းလောက် လှမ်းဆက်ဖေါ်ရသေးသားပင်။

“ငါ…ဖေဖေ့ ပွဲရုံမှာ ၀င်ကူနေရပြီ…”

….ဆိုကာ တဖြည်းဖြည်းသွေးအေးသွားသောအခါ တစ်နှစ်လုံးနေမှတစ်ကြိမ်၊နှစ်ကြိမ် စကားပြောဖြစ်ကြရုံရှိတော့သည်။ ခု…နောက်ဆုံးတစ်ကြိမ်… မိံထံဖုန်းဆက်ခဲ့ လျှင်တော့ ……

“မီတို့ ခြံထဲက ပိတောက်ပင်ကြီး အဖူးတွေနဲ့လား”
“တစ်ကြိမ်တောင် ပွင့်ပြီးသွားပြီ”
“ဟာကွာ ။နစ်နာလိုက်တာ”

မီက….

“ဘာ ဇာတ်လမ်းတွေ လာရှာဦးမလို့လဲ”

သူ တဟဲဟဲသာ ရယ်မောနေခဲ့သည်။

“နေဦး…။ပိတောက်တွေပွင့်တာမြင်ရင် နင်ရော…ငါ့ကို သတိမရနေဘူးလား”

မကွယ်မ၀ှက် ၀န်ခံကြေးဆိုလျှင်တော့ မီ သူ့အားပြင်းပြင်းပြပြ သတိရ နေတတ်တာပေါ့။ နှုတ်ကတော့…..

“ငါ နင့်လို ပိတောက်ရူးမဟုတ်ဘူး ”

ပြောပြီး ဖုန်းချပစ်လိုက်တော့သည်။


* * *

သင်္ကြန်ရက်အတွင်းအရောက်လာခဲ့မည်ဆိုသော ညီက တကယ်တမ်းမှာ သင်္ကြန်လွန်လေမှရောက်လာနိုင်တော့သည်။

သင်္ကြန်၇က်အတွင်းမှာ သူ့ဖခင်ဘက်မှ ဆွေမျိူးများ၏ အလှူရှိ နေလို့ဟုဆိုပါသည်။ ညီ့အဖွားက ညီ့ကိုပါ ရဟန်ခံပေးချင်သည်ဖြစ်ပြန်ရာ ရှင်လိန်ပြန်ညီတစ်ယောက် ကတုံးအသစ်စက်စက်နှင့် မီ့ထံသို့ရောက်လာခဲ့ပါသည်။

“မီ ..ပိတောက်တွေကျန်သေးလား”
“ဘယ်လိုဖြစ်နေလဲ …..အသည်းအသန်။ တို့မြို့မှာ နင်မရှိကတည်းက ပိတောက်လက်ကျန်တွေ အများကြီး….”

ပိတောက်ပင်အောက်သို့ သူနှင့်အတူ ပထမဆုံးအကြိမ် ပြန်ရောက်ရခြင်းပဲဖြစ်သည်။

“နင်..ခဏလေးစောင့်ဦး မီ”
“ဟဲ့…”

တားမနိုင်၊ဆီးမရစွာ ပိတောက်ပင်ပေါ် တလွှားလွှားရောက်သွားခဲ့ပြီ။

“မီရေ…ဖမ်းထား…..ရော့….”

မီကတော့ အေးဆေးစွာ …ပိတောက်တွေ မြေပေါ်ရောက်ပြီးမှ တစ်ခက်ချင်းကောက်ယူစုပုံ ပေးထားလိုက်ပါသည်။

အကိုင်းနိမ့်တစ်ခုဆီအရောက်မှာတော့ ညီသည် မီ့ရှေ့တည့်တည့်သို့ ရုတ်တရက် ခုန်ချလိုက်တော့တာမို့ မီလန့်သွားရတာကို ညီကသဘောကျရယ်မောနေခဲ့သေးသည်။

“ရော့…….”

မီက သူမ၏ လက်ကလေးကုိ ချက်ချင်းနောက်ပြန် သိမ်းဝှက်လိုက်ကာ ခြေတစ်လှမ်းတောင် ဆုတ်လိုက်မိသေးသည်။

“ပိတောက်လက်ဆောင်လေ မီရဲ့…။ နင့်ဖို့…...”

မီ ချာခနဲ လှည့်ထွက်ခဲ့လိုက်တော့သည်။


* * *


“ဒီ ငုဝါပင်ကလေးက နင်ကိုယ်တိုင်စိုက်ထားတာပေါ့။ ဟုတ်လား….မီ”

မီ ခေါင်းညိတ်ပြလိုက်ပါသည်။ ညီက လေးလေးနက်နက်ပြုံးနေခဲ့လျှက်က…..

“……ဟုတ်တယ်နော်။ မီပြောမှ တွေးမိတယ်။ လူတွေအတော်များများက တစ်နှစ်မှတစ်ခါသာပွင့်တယ်ရယ်လုိ့ ပိတောက်ကိုသာ သဲကြီးမဲကြီး ရှိနေကြတာ..။ ဒါပေမယ့်ပိတောက်အလှက ခဏပဲ။ ငုဝါပန်းလေး တွေကမှ ဘယ်သူသိသိ၊မသိသိ တစ်နွေလုံးလှနေ၊ ဝေနေတော့တာပဲ…”

အဲဒီ ဇွတ်တရွတ်နိုင်သောညီက အညာမှ သူ့အဖေနှင့်အဘွားကို ချက်ချင်းကြီး လှမ်းမှာကာ သူ့အမေနှင့်အတူ မီ့မိဘတွေထံ လာရောက် ကြောင်းလမ်းကြတော့မည်။ ပြီး.....

“တို့နှစ်ယောက် တူတူနေရင် ငုဝါပန်းတစ်ပင် ကိုယ် ကိုယ်တိုင်စိုက်ပေးဦးမယ်”

………..တဲ့။

မီ ငြင်းလိုက်ပြန်လျှင်လည်း အနှစ်နှစ်၊ အလလက ….ငယ်သံယောဇဉ်တွေကိုမထောက်ညှာရာ ရောက်မှာ စိုးပါသည်။ ။



သတိုး